Bericht Mädchenriege

 

Am 9. Januar 2018 hei mir im neue Jahr mit dr Meitlirige gstartet. Es isch

«üebe, üebe, üebe» agseit gsi. Turnervorstellig isch vor dr Tür gstange. Ungerem Motto «Bruefswahl» hei mir mit dreine Nummere mitgmacht;

Fürwehr, Filmreggisseur u Schauspieler. Am 27. Januar isches de sowit gsi. Aui hei sich riesig gfröit u aues gä. Es isch e super Erfolg gsi u wird üs sicher no lang i Erinnerig bliebe.

Churz druf isch scho wieder d`Amäudig füre Meitliriegetag cho. Auso hets wieder gheisse «üebe, üebe, üebe». So isch de när Tschoukball u Unihockey im Mittupunkt gstange. Mit viu Fliess hei mir üs guet uf dä Tag chönne vorbereite.

Am Sunntig 17. Juni isches de sowit gsi u mir hei z`Bätterkinden am Morge mit Liechtathletik gstartet. Aui Meitli hei voue Isatz zeigt, o wenn sech die meiste sicher meh ufe Namitag hei gfreut. So hei de näre am Nami d’Spiu agfange.

Im Tschoukball si mir mit eire Mannschaft bis is Final cho. Leider hets de dört när nid ganz glängt, isch aber e super Leistig vo de Meitli gsi, Bravo!

Ou im Unihockey und Seilizie hei d’Meitli wieder 100% gäh, leider ohni Erfoug. Aber isch jo nid so schlimm. So hei mir d Möglichkeit üs im nöchschte Johr z steigere.

När hei d’Meitli wohl verdient es paar Wuche Ferie gha, so dass mir nade Summerferie wieder mit vouem Isatz hei chönne starte.

Im Moment dörfe mir mit zwone ufgsteute Gruppe turne und das macht üs unheimlich Spass u isch sehr motivierend.

Mir danke aune Eutere für iri Ungerstützig u ihres Vertroue i üs Leiterinne.

                              Ds Leiterteam: Christine, Debora u Monja